САХАЛЫЫ

САХАЛЫЫ

10:42
17 Мая 2017

 «Идэбин сөбүлүүбүн, дуоһуйууну ылабын»

Уйулҕаны үөрэтээччилэр этэллэринэн, киһи бу олоххо төрөөн баран, бастатан туран, сөбүлүүр идэтин баһылаан бэйэтин баҕатын хоту үлэлиирэ өйүгэр-санаатыгар, кутугар-сүрүгэр, ис туругар улахан туһалаах. Онон ис сүрэҕиттэн сөбүлүүр идэтигэр таба тайаммыт киһи ‒ дьоллоох. Бэйэ оҥорон таһаарыы сылыгар талан ылбыт идэлэринэн сирдэтэн үлэлээн-хамсаан эрээччилэр аҕыйаҕа суохтар.  Соторутааҕыта биһиги Хара нэһилиэгэр олорор эдэр ийэ Туйаара Константиновна Павловалыын  кэпсэтэргэ сананныбыт. Кини былырыыҥҥаттан минньигэс туортары, бурдук ас арааһын оҥорор. 

‒ Анал идэлээххин дуо?

‒ Мин Нам улууһугар Граф биэрэгэр  2 №-дээх  профессиональнай лиссиэйгэ «Кондитер» идэтигэр үөрэммитим. Онно бурдук ас хайдах оҥоһуллар ымпыгын-чымпыгын, технологиятын үөрэппитим. Бэйэм минньигэс аһы астыырбын олус сөбүлүүбүн, идэбинэн киэн туттабын.  

‒ Хаһааҥыттан кондитерскайы аһан үлэлэтэҕиний?

‒ Былырыын биисинэс-былаан суруйаммын, улуустааҕы нэһилиэнньэ социальнай харысхаллаах буолууга управлениетын иһинэн көмүскээн, «Социальнай хантараак» бырагырааматын чэрчитинэн киирсэммин, сөптөөх үп-харчы көрүллэн, ас астыырбар туттуллар тэриллэри ылбытым. Электро-уотунан үлэлиир  оһох, халадьыынньык, туорт иһиттэрэ, бурдук ас пуормалара о.д.а. маллары ыламмын күн-бүгүн үлэлии сылдьабын.

‒ Туортаргын хайдах ньыманан оҥороҕунуй?

‒ Бискибиит уонна медовай туортары оҥоробун, араас көрүҥ кириэми туттабын. Үксүн сакааска оҥорор буоламмын, килийиэннэр хайдах быһыылаах-таһаалаах сакаастаабыттарынан, кинилэр баҕаларын толоро сатыыбын. Туортарбын киилэнэн көрөн атыылыыбын. Холобур, медовай туорт биир киилэтэ 600, бискибиит ‒ 700 солкуобай. Бородууксуйаларбын үксүн Аллараа Бэстээхтэн, сороҕор Майаттан, Дьокуускай куораттан ылааччыбын. Туортартан атын пирожнайдарга эмиэ холонобун. 

‒ Билиҥҥитэ сакаас төһө киирэрий?

‒ Сакаас арааһынайдыыр. Сороҕор түүннэри да үлэлиэхпин сөп. Бырааһынньыктарга, биллэрин курдук, үлэм элбиир. Оҕо төрөөбүт күнүгэр, үбүлүөйдэргэ диэн эмиэ сакаастыыллар. Хараны таһынан Майа чугас буолан элбэх килийиэн Майаттан, ону сэргэ Лоомтукаттан, Бөкөттөн да сакаастааччылар.

Бэйэтин дьыалатын саҥа саҕалаан эрэр эдэр үлэһит  туох баҕа санаалааххыный?

‒ Мин билигин оҕолорум кырачаан буоланнар дьиэбэр олорон үлэлиибин. Оҕолор оҕо саадыгар бардахтарына, инникитин кыахпын арыый улаатыннаран, анал дьиэлэнэн-уоттанан өссө сайдан, кэҥээн үлэлиир ыра санаалаахпын. Үөрэниэн баҕалаахтарга маастар-кылаастары да ыытыы туһунан  кыралаан толкуйдааччыбын. Уопсайынан, бэйэм идэбин олус сөбүлүүбүн, дуоһуйууну ылан үлэлиибин.  

‒ Туйаара, инникитин хорутуулаах үлэни баҕарабыт, өссө үүнэн, сайдан ис.

Виктория БЕЛОЛЮБСКАЯ.

Мэҥэ-Хаҥалас